恐怖的1歲針.......

呢3支針比我想像中更恐怖.....

初初對呢3支針認識唔多，淨係知打完有機會發燒,

6/11 哥哥1歲生日帶佢去健康院打針，呢3枝分別係：

*麻疹、流行性腮腺炎及德國麻疹混合疫苗 - 第一次

*肺炎球菌疫苗 - 加強劑

*水痘疫苗 - 第一次

哥哥打完針第二日已經有d發燒38度幾，食咗幾次藥水退左燒，我以為燒完冇事，點知隔左兩日又再燒過，維持38度幾至39度幾，體溫一直上上落落，

佢胃口唔太好，唔多想食野，有兩次食粥仔嘔返出黎，比平時扭計同好痴身。每次餵藥佢都好大力爭扎同大喊，佢會合埋口唔肯食，勉強餵到入口，佢都會bu出黎，又試過嘔返晒出黎，嘔到成面都係，見到佢個樣咁辛苦，其實真係好肉赤。

發燒大約燒左4日先完全退燒，幾乎食晒成樽退燒藥。點知又發現佢塊面同身都出左一粒粒紅點，我又好驚，因為佢從來未出過疹，所以我唔知佢係出水痘定係唔知咩疹。好彩有個朋友係做護士嘅，我即刻影相比佢睇下，佢話應該係打完針嘅反應疹，大約一兩日就會自己退，叫我觀察下先。第二日d紅點真係退左好多，等我仲放心晒...    

點知......個仔唔知點解肚屙，屙左好多次，屙水屙到個pat pat損晒，每次換片佢都痛到大喊大叫，即刻帶佢睇醫生，醫生話發炎有菌，開咗腸胃藥同埋藥膏，食藥又係食到嘔左出嚟，好彩食咗一次已經冇再屙水，藥膏揸左兩次都已經好左6成，兩日後已經完全好返。

哥哥自從打完針後，成個人瘦左好多，輕左接近1kg，大脾幼到我一隻手都幾乎捉得晒。其實佢出世已經好輕，得2.25kg, 食量又唔大，成日食好少野就唔食，又訓得好少，好似天生唔多鍾意訓覺，追體重追得好吃力，而家咁樣搞一搞又瘦返晒，希望可以快d追返上黎。

QE開刀生產記

細佬b話咁快已經滿月，好想趁仲有記憶，記錄一下我嘅生產日記。

由於上年生哥哥係開刀（哥哥size太細，醫院建議開刀），所以今胎QE比我揀開刀或者順產，我最後揀咗開刀，去到34w產檢醫院先比日期我，安排左38w入院。

21/10 10am就要入院, 先去急症室登記再上C2, 星期日上午嘅C2冇乜人，好靜，先有姑娘幫我磅重、量血壓同剃毛毛，之後分配個床位比我，換完衫、驗左小便就有姑娘走黎同我抽血，跟住叫我可以休息下。

其實唔知點解要我咁早入院，因為隔離床媽媽都係等開刀，但佢係下午先入院，另外對面床同附近床等催生嘅媽媽都係下午先入院，係得我一個被安排咁早入院。全日好無聊咁捱過，好彩夜晚探病時間有屋企人黎，唔洗咁悶。

22/10 未到6am 我就聽到隔離床媽媽被姑娘吵醒話種豆，我以為跟住就到我，（因爲上年生哥哥都係未天光就種豆，但我係下午先開刀）點知姑娘冇黎搵我，我又唔敢再訓，坐喺床度等呀等，等到10點半左右終於有人同我講下一個到我，叫我除晒衫換件紫色袍，跟住姑娘走黎同我插尿喉，講真插尿喉嘅感覺真係唔多舒服，跟住就自己瞓上床被推去手術室。

今次係第二次入手術室，已經冇上一次咁驚，我上次直頭未入手術室已驚到流眼淚，覺得手術室好恐怖。今次心情輕鬆少少, 但都有dd緊張, 首先有人幫我喺手背種豆（今次覺得唔係好痛，可能手勢好d），打埋麻醉針就即刻開始，開刀雖然唔痛但都係有感覺嘅，feel到被人拉扯緊，有時會㩒住我好大力扯，今次過程比上次耐好多，令我一度擔心係咪有d咩問題，好彩最後細佬b平安出世，3.36kg我好滿意嘅重量，聽到佢第一下喊聲嗰陣真係好感動， 我忍唔住喊左出黎。

跟住有人抱細佬過黎比我睇，同我講醫生頭先用鉗夾佢出黎，所以個頭同塊面有條痕，我即刻好驚會唔會有疤，但佢話條痕會退嘅，原來頭先手術搞咁耐係因為要用鉗， 雖然我好疑惑開刀點解要用產鉗，不過佢話條痕好快會退嘅，我就算喇。

縫埋傷口搞掂晒之後，我就被推去手術室外休息一陣，手術後我一直覺得好凍好凍發冷咁，姑娘幫我蓋左張熱嘅氈，同埋抱bb放喺我心口肌膚接觸，唔記得休息左幾耐，就推左我去G2產後房, d麻醉藥令到我好暈好暈同埋係咁嘔，最後要打止嘔針先得，由於真係太唔舒服，細佬b就交比姑娘幫我照顧一晚先。

總括今次生產經歷:

1. 我覺得傷口比上次痛好多好多，喺醫院幾日行步路都覺得好痛， 出院都要繼續食止痛藥，食到d藥冇晒，而家個傷口已經唔痛喇
2. 細佬塊面條疤第三日就退左，不過額頭近頭皮個位仲有少少印未退晒，但呢個位頭髮係可以遮到嘅